Mae Gogledd Cymru yn llawn cewri. Yn wir, maent i'w canfod ym mhob twll a chornel yno. Unwaith dros y ffin gallwch groesi pont ddwr anferth Pontcysyllte - pont ddwr fwyaf Prydain, a ddyfeisiwyd gan y cawr o beiriannydd Thomas Telford. Gallwch hefyd gwrdd â'n cyndeidiau yn ein cestyll di-rif - y prosiect adeiladu mwyaf uchelgeisiol yn Ewrop yn ystod y Canol Oesoedd (mae cestyll Caernarfon, Harlech, Conwy a Biwmares i gyd yn Fannau Treftadaeth Byd). Beth am fenter adeiladu fodern? Mae un enfawr yn cael ei chyflawni ar hyn o bryd ar ben yr Wyddfa, sef mynydd uchaf Cymru a Lloegr. Enw'r fenter hon yw Hafod Eryri, a phan yn gyflawn, bydd rhywle ar frig y mynydd i chi ymlacio a chynllunio eich taith i lawr.
Nid yw statws cawr wedi ei gyfyngu i bethau mawr yn unig, fodd bynnag. Mae gennym gewri bychain, hefyd. Capel bychan Sant Trillo yn Llandrillo-yn-Rhos, er enghraifft - y capel lleiaf ym Mhrydain. Os hoffech fynd ar bererindod ddiwylliannol, beth am ymweld ag Oriel Ynys Môn i weld y darluniau o Ogledd Cymru gan Kyffin Williams, wrando ar lais gwefreiddiol Bryn Terfel yng Ngwyl y Faenol, neu wylio perfformwyr o fwy na 50 gwlad yn cystadlu yn erbyn ei gilydd bob Gorffennaf yn Eisteddfod Gerddorol Ryngwladol Llangollen?
Yn Llyfrgell Sant Deiniol ym Mhenarlâg gallwch bori drwy gasgliadau llenyddol Gladstone, y Prif Weinidog Fictoraidd, tra bod cartref plentyndod Lloyd George, y Prif Weinidog yn ystod y Rhyfel Byd Cyntaf, ar agor i'r cyhoedd yn Llanystumdwy ym Mhenrhyn Llyn.
A ydych chi'n hoffi storiâu dychmygol? Os hynny, mae gennym gewri mytholegol hefyd, o storiâu gwerin i storiâu tylwyth teg, gan gynnwys y chwedl am y Tywysog Madog ab Owain yn darganfod America 300 mlynedd cyn Colwmbws!